വിശുദ്ധ ആന്റണി മേരി ക്ലാരെറ്റിന്റെ തിരുന്നാൾ ഇന്ന് ആഘോഷിക്കുമ്പോൾ വിശുദ്ധന്റെ ജീവിതത്തിലെ അത്ഭുതകരമായിരുന്ന ഒന്നായിരുന്നു ഈശോയുടെ നിരന്തര സാന്നിധ്യം. അദ്ദേഹം കർത്താവിന്റെ കൗദാശിക സാന്നിധ്യം നിരന്തരം ഹൃദയത്തിൽ സൂക്ഷിക്കാൻ അനുവദിക്കപ്പെട്ടിരുന്ന വിശുദ്ധനാണ്. അദ്ദേഹത്തിന്റെ ചിത്രം തന്നെ ഹൃദയത്തിൽ ദിവ്യകാരുണ്യത്തിന്റെ രൂപവും, അതിൽനിന്ന് ഒരു പ്രകാശവും ഒഴുകിയിറങ്ങുന്നതായി ചിത്രീകരിച്ചിരിക്കുന്നു. 1861 ഓഗസ്റ്റ് 26 മുതൽ 1870 -അദ്ദേഹത്തിന്റെ മരണം വരെ ഈശോയുമായി കൗദാശിക ഐക്യത്തിൽ ജീവിക്കാൻ സാധിച്ചു. അതിതീക്ഷ്ണമതിയായ വിശുദ്ധൻ, തന്റെ ശക്തി മുഴുവൻ സംഭരിച്ചതു ദിവ്യകാരുണ്യത്തിൽ നിന്നാണ്. വിശുദ്ധന്റെ സഭാ സ്നേഹവും ഒത്തിരി പ്രസിദ്ധമാണ്; ആത്മീയ ജീവിതത്തെ ക്രമീകരിക്കാൻ സഹായിക്കുന്ന മൂന്നു കാര്യങ്ങൾ വിശുദ്ധൻ പഠിപ്പിക്കുന്നു; വിശുദ്ധബലി, ദൈവവചനം, പരിശുദ്ധ അമ്മ. ഒത്തിരിനേരം ദേവാലയത്തിൽ ചെലവഴിച്ചിരുന്ന അദ്ദേഹം ഈശോയുമായി അഭേധ്യമായ ബന്ധം കാത്തുസൂക്ഷിച്ചിരുന്നു.