വത്തിക്കാന്‍ സിറ്റി: ബനഡിക്ട് 16-ാമന്‍ മാര്‍പാപ്പ സ്വകാര്യ തിരുക്കര്‍മങ്ങള്‍ക്ക് മധ്യേ നല്‍കിയ വചനസന്ദേശങ്ങള്‍ ഉള്‍ക്കൊള്ളിച്ച് വത്തിക്കാന്‍ പബ്ലിഷിംഗ് ഹൗസ് ”The Lord Holds Us by the Hand” (കര്‍ത്താവ് നമ്മെ കൈപിടിച്ചു നടത്തുന്നു) എന്ന പുസ്തകം പുറത്തിറക്കി. പാപ്പയുടെ ജ്ഞാനവും ദൈവശാസ്ത്ര പാണ്ഡിത്യവും ഭാഷാപ്രാവീണ്യവും ലോകത്തിന് ലഭ്യമാക്കിയ വത്തിക്കാന്റ നടപടി അടുത്തവര്‍ഷം ആചരിക്കുന്ന പാപ്പയുടെ ജന്മശതാബ്ദിക്ക് മുന്നോടിയായുള്ള അപൂര്‍വ സമ്മാനമായി. കഴിഞ്ഞ വര്‍ഷം ഇറ്റാലിയന്‍ ഭാഷയില്‍ പുറത്തിറക്കിയ പുസ്തകത്തിന്റെ ഇംഗ്ലീഷ് പരിഭാഷയാണ് ഇപ്പോള്‍ പുറത്തിറിക്കിയിരിക്കുന്നത്.

ബൗദ്ധിക പ്രൗഢിയേക്കാള്‍, ക്രിസ്തുവിനോടുള്ള സ്‌നേഹത്താല്‍ ജ്വലിക്കുന്ന ഇടയന്റെ ആര്‍ദ്രതയാണ് ഈ പുസ്തകത്തില്‍ ഉടനീളം തുടിക്കുന്നത്. 2005 മുതല്‍ 2017 വരെയുള്ള കാലഘട്ടത്തില്‍ ബനഡിക്ട് മാര്‍പാപ്പ അര്‍പ്പിച്ച സ്വകാര്യ ദിവ്യബലികളിലെ വചനപ്രഘോഷണങ്ങളാണ് ഇതില്‍ ക്രോഡീകരിച്ചിരിക്കുന്നത്. മാര്‍പാപ്പയായിരുന്ന കാലത്തെയും, തുടര്‍ന്ന് 2013-ല്‍ സ്ഥാനത്യാഗം ചെയ്തതിനുശേഷവുമുള്ള പ്രഭാഷണങ്ങള്‍ ഇതിലുണ്ട്. അപ്പോസ്‌തോലിക് കൊട്ടാരത്തിലെ സ്വകാര്യ ചാപ്പലിലും, പിന്നീട് പാപ്പ വിശ്രമജീവിതം നയിച്ച വത്തിക്കാനിലെ മാറ്റര്‍ എക്ലേസിയ ആശ്രമത്തിലും പാപ്പ അര്‍പ്പിച്ച ദിവ്യബലികളിലെ പ്രഭാഷണങ്ങള്‍ ഇതില്‍ ഉള്‍പ്പെടുന്നു. ആഗമനകാലം, വലിയ നോമ്പുകാലം, ഈസ്റ്റര്‍ തുടങ്ങിയ സഭയുടെ പ്രത്യേക തിരുനാള്‍ കാലങ്ങളിലെ വചനസന്ദേശങ്ങളാണ് ഈ പുസ്തകത്തില്‍ ഉള്‍ക്കൊള്ളിക്കുന്നത്. ഇതിന്റെ തുടര്‍ച്ചയായി, സഭയുടെ സാധാരണ കാലങ്ങളിലെ വചനപ്രഘോഷണങ്ങള്‍ അടങ്ങുന്ന രണ്ടാം ഭാഗം പിന്നീട് പ്രസിദ്ധീകരിക്കും. ബനഡിക്ട് 16-ാമന്‍ മാര്‍പാപ്പയുടെ പേഴ്‌സണല്‍ സെക്രട്ടറിയായിരുന്ന ആര്‍ച്ചുബിഷപ് ജോര്‍ജ് ഗാന്‍സ്വെയിന്‍ എഴുതിയ ആമുഖവും, ജോസഫ് റാറ്റ്‌സിംഗര്‍- ബനഡിക്ട് 16-ാമന്‍ വത്തിക്കാന്‍ ഫൗണ്ടേഷന്‍ പ്രസിഡന്റ് ഫാ. ഫെഡറിക്കോ ലൊംബാര്‍ഡിയുടെ അവതാരികയും ഈ പുസ്തകത്തിന് മാറ്റുകൂട്ടുന്നു. 2027-ല്‍, ബനഡിക്ട് 16-ാമന്‍ മാര്‍പാപ്പ ജനിച്ചതിന്റെ നൂറാം വാര്‍ഷികം ആഘോഷിക്കാനിരിക്കെ, ആഗോള കത്തോലിക്കാ സമൂഹത്തിന് വത്തിക്കാന്‍ നല്‍കുന്ന ഏറ്റവും വലിയ ആത്മീയ സമ്മാനമായി മാറുകയാണ് ഈ വചനശേഖരം.