യേശു പറഞ്ഞു: ആളുകളെയെല്ലാം ഭക്‌ഷണത്തിനിരുത്തുവിന്‍. ആ സ്‌ഥലത്തു പുല്ലു തഴച്ചുവളര്‍ന്നിരുന്നു. അയ്യായിരത്തോളം വരുന്ന പുരുഷന്‍മാര്‍ അവിടെ ഇരുന്നു. ( യോഹ 6, 10 ) വളർന്നുനിൽക്കുന്ന പുല്ലുപോലും ശ്രദ്ധിക്കപ്പെട്ടിരുന്നുവെന്നത് വിശുദ്ധ ബലിയർപ്പണത്തിൽ ഓരോ കാര്യങ്ങളും എത്ര ശ്രദ്ധയോടെ ചെയ്യണമെന്നും, എത്ര കൃത്യതയോടെയാണ് സ്ഥലവും, പരിസരവും, വ്യക്തികളുടെ നിലപാടുകളും നിർവ്വചിക്കപ്പെട്ടിരിക്കുന്നുവെന്നതും കാണിക്കുന്നു. ആശീർവദിക്കുകയും, വിഭജിക്കുകയും, നൽകുകയും ചെയ്യുന്ന ക്രിസ്തു ബലിയർപ്പകനായി മാറുകയും, എടുക്കുകയും, ഇരിക്കുകയും, വരികയും, കാണുകയും, ഭക്ഷിക്കുകയും ചെയ്യുന്ന ജനക്കൂട്ടം ബലിയർപ്പണത്തിൽ പങ്കെടുക്കുന്ന വിശ്വാസജനമായി മാറുകയുമാണ്. അപ്പവും മീനും വിതരണം ചെയ്യുന്ന ക്രിസ്തു; ബലിവസ്തുവും ബലിയർപ്പകനും ആകുന്ന പുതിയ ഉടമ്പടിയുടെ പുരോഹിതനെ പ്രതിനിധാനം ചെയ്യുകയുമാണ്. വിശുദ്ധ യോഹന്നാന്റെ സുവിശേഷത്തിലെ ആറാം അധ്യായം ഒന്നു മുതൽ 15 വരെയുള്ള തിരുവചനങ്ങളിൽ നിലനിൽക്കുന്ന കുർബാന ദർശനങ്ങൾ നമ്മളെ അത്ഭുതപ്പെടുത്തുന്നു. അതൊരു അപ്പം വർദ്ധിപ്പിക്കലല്ല മറിച്ച് ഒരു ബലിയർപ്പണമാണ് എന്ന് സത്യം എത്ര മനോഹരമാണ്.
