നടന്നു നീങ്ങിയവർക്ക് തിരിച്ചു വരവിന്റെ വഴിയൊരുക്കാൻ വിശുദ്ധ കുർബാന കാരണമാവുകയാണ്. “ആ ദിവസം തന്നെ അവരിൽ രണ്ടു പേര് ജറുസലേമിൽ നിന്ന് എകദേശം അറുപതു സ്താതിയോൺ അകലെയുള്ള എമ്മാവൂസ് ഗ്രാമത്തിലേക്ക് പോവുകയായിരുന്നു” (ലൂക്കാ 24,13). ലൂക്കായുടെ സുവിശേഷം 24 -ാം അദ്ധ്യായം 17 -ാം തിരുവചനം; അവർ മ്ലാനവദനരായിരുന്നു. ശിഷ്യന്മാർ ജെറുസലേമിലെ സമൂഹത്തിലേക്ക് വീണ്ടും തിരിച്ചുവരാനായിട്ട് കാരണമാകുന്നത്; അപ്പം മുറിക്കൽ ശുശ്രൂഷയാണ്. “അവൻ അപ്പം അവർക്ക് മുറിച്ചു നൽകി. അപ്പോൾ അവരുടെ കണ്ണുകൾ തുറക്കപ്പെട്ടു” (ലൂക്കാ 24,31). പ്രതീക്ഷയുടെ ഇത്തിരി വെട്ടം അടങ്ങിയപ്പോൾ മ്ലാനവദനരായിരുന്നവർ, യാത്രതിരിച്ചവർ; കണ്ണുകൾ തുറക്കപ്പെട്ടപ്പോൾ, കഴിഞ്ഞുപോയ വഴിത്താരകളിലെ കാൽപ്പാടുകൾ കണ്ട് തിരികെ നടക്കുകയാണ്. ” അവർ അപ്പോൾ തന്നെ എഴുന്നേറ്റു ജെറുസലേമിലേക്കു തിരിച്ചു പോയി” (ലൂക്കാ 24, 33).